1 Corinthians 8
Ashan Nyagyi
1Oɓo ko jesun lo sai ɓenya n fye ɓo nya tu n nyagyi tukwo na ku ashan gba cei nyi. Tu ɓenya ye tukwo zaho-zahoi gyelo ngye owo ɓegbe-dna nu gna bmiya lo. Ɓeye-kpe bmiya ʼza shi, ama oɓo na gna yelo ntu ikklisiya mimi ɓo ko nu zhin yeye. 2Oza wo gye ge wo kpe aɓo ye lo vinya, to, wo bwa wo tnayekpe nu bmi zo wu. 3Ama oza wo ye Shekwoyi ɓehin-hin nya, owo nu bmiya shi lo n Shekwoyi ɓa kpe wo ye.4To, yi ɓa gyi nya na ku shan gba cei? Yi kpelo ge oshan to ku Shekwoyi nu zhin m, yi-i kpelo ge Shekwoyi bwasun gmanyi nu. 5Azaho zhin ɓa da ge a Shekwoyi lo mwa begye n ʼshe ɓedo n ʼkni yi. 6Ama yi kpelo ge Shekwoyi bwasun lo gmanyi nu, Owo nu zhin Dada nwa zhin anya vinya, Wa zhin yi ya ze Wa nya. Njesun Dagayi bwasun gmanyi nu – Yesu Kristi – Wo nu na zhin anya vinya, Woi ga yi-wyewyeyi njesun.
7Dudu lomu, a Yesu-viyi ho ta kpe ɓeye ye lon. Ntu ɓa mida ɓo na shan yi, oɓa ɓenubo-zhin gna ɓa ge ashan zhin anya awye-wyeyi nu, har ɓa ku gaiciya ga ge nyagyi na la ko ga ʼshan, a la ku Shekwoyi nu ga. Ntu cenu she ɓa gyi nyagyi-yipya, kwa lu ɓa n bugba. 8Pa ge Shekwoyi to damu lo ko yi gyi, ko to yi gyim. Ko ta zhin ya gba-gba m, n yi to gyi m, kwoi ta ɓe yi mwa-mwa yi ya gyi m. 9Ama fye zhin peceiye n iko yi fye cei lo ntu ko gyi ɓo, sakun fya zhin Yesu-viyi ho, nwo bugba to kalai lon, wa kaya dna laifi.
10Oɓo nyi ko ɓa zhin; ngye zaho lo n wo to n bugba kalai lo dna na ɓeye pyam, hoi kpe honya lo ge nyagyi ye pya ta zhin ho nyahon, hoi gyi nyagyi na ʼshan nyakun, ai deye ɓa cewo bwa har wa lo o-shan nyakun ntuge wa gyi nyagyi, bugba yi gwo wo lu. 11To, ntu ge ho “kpe lo ge ko to zhin nyaho nun hoya gyi m,” ho ɓa zhin Yesu-viyi do n wo bugba to kalai lon wa bwi dna zafun, oho zado n Yesu wa fi ntu wo ɓo. 12Ko zhin laifi nu n Kristi abye ho ya ce ho zado bwa wa zhin ɓo n wo bugba zun wo kni da ce. 13Nuce nu, ndai ashan-bu gyi ɓa zhin mi zado wa zhin laifi, mi ta shan ɓa gyim har nyalo-nyalo, ntuge mi ta ye lo ma zhin mi zado, wa zhin laifi m.
Copyright information for
GbrGAW